ភ្នំពេញ៖ ព្រះមហាក្សត្រនៃព្រះរាជាណាចក្រកម្ពុជា សម្ដេចព្រះបរមនាថ នរោត្តម សីហមុនី បានត្រាស់បង្គាប់ផ្ដល់នីតិសម្បទាធ្វើនយោបាយឡើងវិញដល់សមាជិកអតីតបក្សប្រឆាំងលោក ស៊ុន ចន្ធី និងលោក មុត ផល្លា តាមការបង្គំទូលថ្វាយពីសម្ដេចតេជោ ហ៊ុន សែន។
ក្នុងរាជក្រឹត្យដាច់ដោយឡែកចំនួន២សន្លឹក ព្រះមហាក្សត្របានត្រាស់បង្គាប់ឱ្យផ្ដល់សិទ្ធិធ្វើនយោបាយដល់អ្នកទាំងពីររូបនេះកាលពីថ្ងៃទី១០ ធ្នូ ម្សិលមិញ។
លោក ស៊ុន ចន្ធី គឺជាអតីតប្រធានគណៈកម្មាធិការប្រតិបត្តិខេត្តកំពង់ធំនៃអតីតបក្សសង្គ្រោះជាតិ ហើយលោក មុត ផល្លា គឺជាអតីតប្រធានគណៈកម្មការប្រតិបត្តិខេត្តសៀមរាប។
គិតរហូតមកដល់ពេលនេះមានអតីតមន្ត្រីគណបក្សសង្គ្រោះជាតិ២៦រូបហើយ ដែលត្រូវបានផ្ដល់សិទ្ធិធ្វើនយោបាយឡើងវិញ ក្នុងចំណោមអ្នកដែលត្រូវហាមឃាត់ចំនួន១១៨នាក់៕
